בצאת ישראל

בְּצֵאת יִשְׂרָאֵל מִמְּצָרִים בֵּית יַעֲקֹב מֵעַם לֹעֵז :
הָיְתָה יְהוּדָה לְקַדְּשׁוֹ יִשְׂרָאֵל מַמְשְׁלוֹתָיו :
הַיָּם רָאָה וַיָנֹס הַיַּרְדֵּן יִסֹּב לְאָחוֹר :
הֶהָרִים רָקְדוּ כְּאֵילִים גִּבְעוֹת כִּבְנֵי צֹאן :
מַה לְּךָ הַיָּם כִּי תָּנוּס הַיַּרְדֵּן תִּסֹּב לְאָחוֹר :
הֶהָרִים תִּרְקְדוּ כְּאֵילִים גִּבְעוֹת כִּבְנֵי צֹאן :
מִלִּפְנֵי אָדוֹן חוֹלִי אָרֶץ מִלִּפְנֵי אֱלֹהַּ יַעֲקֹב :
הַהֹפְכִי הַצּוּר אֲגַם מַיִם חַלָּמִישׁ לְמַעְיְנוּ מַיִם :